Naammattoorsimasat ilaat

Meeraanerma annersaa kiisalu inuusuttuaraanerma ilaa Ilulissani najugaqarsimavunga. Ilulissani meeraanerup inuusuttuaraanerullu ilagilluinnartarpaa Ilulissat eqqaani nunami pisuttuarneq - amerlanerit qimussit aqqutaanni pisuttuarnerusarput. Uagullu kammalaatigiiaarluta/illortaariaarluta ilaanneeriarluta pisuttuartarpugut sermermiunit timmut akinnaq pukkinnerup tungaatigut akinnaq portunikkut mittarfiup tungaanut. Ilaanni qoorortuuaqqamik nassataqarluta iluatsitseriarluta aqissinik angerlaassisarluta. 

Iluliarmiut Ilulissaniissimasulluunniit akinnaq pukkinnerup tungaanut pisuttuarsimasut/qimussersimasut nalunngilaat akinnaq pukkinneq sivingalaartukasimmik ammut aallartiffeqartoq. Qimusserluni akinnaq pukkinneq sisuffigitinnagu perlataarumanngikkaanni qimmit kingullinngortinneqartarput. Aallartinnermi pissanganartuaannarpoq perlataarsinnaanerup periarfissaanera, ilaannilumi qimussinik allanik majuartoqarnersoq ilisimaneqarsinnaasarani - tassa aallartiffiata sivinganerata kingunerani naqqanniffissaq ersinneq ajormat.

Inersimasunngoreerlungaana Ilulissaniitillunga aliannaarlunga Sermermiunit aallartillunga pisuttuarama videoliuserlunga, akinnaq pukkinnermi meeraallunga sisunermi imaluunniit majuarnermi pisarsimasut eqqaajallaataa sivinganersua filmiliorniarsaritillugu qimussertoqarneranik kalerrinneqarpunga. Qimussit aggerpaluttut tusaalerlugit malinnaaffigilerakkit, qimussit pingasuupput tulleriillutik akinnaq pukkinnikkut sisulersut - siulleq torrallavillugu ammut sungiussisimapaseqaluni sisulersoq filmiliorpara, qimmii qamutip saamerliatigut kinguariartoramik qamutit tunuatigut ammut tamannguat aallarput; qimussiussisoq eqqissisimagaarami qungujulluni ilassiorpoq. Qimussit tullii qimmini eqqissiivilluni unissarsinnarlugit kingullinngortillugit qamutini ajattarlugit ammut sisullutik tarriinnaqaat. Qimussit pingajuat ammukariartorlutik nuinngitsut nilliarpalussuaq tusaalerpara, tassaana qimussiussisup qimmini assut suangasarlugit unissarai. Unissareerlugit qimmini kingullinngortillugit ammut aallarpoq nipissani tamaat qimmit unissartuarlugit, kiisaana qimussit sisusut ersikkunnaarput suli unissaarpasilluni.

Kingorna takuakka qimussit tamarmik perlataarnatit ammut apuussimasut, tamannaluni pingaarnersaavoq. Aanali eqqarsaasersuutigisartagara, qimussit pingasut ammut sisusut tamarmik immikkut pissuseqarlutik sisupput. Immaqa aamma aqutsinermi tamanna ullut ilaanni ersarittarsimassaaq?

Tusaamasat.dk attavigiuk: